تحدث الفنان محمد مهران عن كواليس أعماله الأخيرة، وكشف للمرة الأولى تفاصيل تجربته في موسم دراما رمضان 2025، وخاصة مشاركته في مسلسل “فهد البطل”، ورد على الانتقادات التي طالت العمل.
نجاح “فهد البطل”
وقال مهران، خلال استضافته في بودكاست “وفيها إيه” عبر منصة ستوري بالعربي: “مسلسل فهد البطل حقق نجاح كبير وحلو، ولمست ده في الشارع وقت عرضه. أنا شخص بتعامل كتير مع الناس في الشارع، خاصة في المناطق الشعبية ومنها مصر القديمة، وهناك لقيت إن العمل متشاف بشكل واسع والناس مبسوطة بيه”.
وأضاف: “ما توقعتش النجاح لكن تمنيت من ربنا أن الدور يحقق صدى، والتيسير كله من عند ربنا”.
عن النقد الفني
وعلّق مهران على الانتقادات الموجهة للعمل قائلاً: “مش دايمًا بيظهر لي النقد، لكن لما بيظهر سواء من مشاهد عادي أو ناقد متخصص بقرأه وأفلتره وآخد اللي يفيدني. النقد عملية مهمة جدًا، وإحنا درسناها في معهد الفنون المسرحية في قسم التمثيل والإخراج. النقد سواء جه بالفطرة أو بالدراسة لازم تسمعه وتستفيد منه، مش تتعامل معاه بتعالي أو تعتبره هجوم شخصي”.
وتابع: “أحيانًا في اللوكيشن بسأل المخرج أو فريق العمل عن رأيهم، لكن الرأي الأول والأخير لصانع العمل. النقد بيخليك تطور نفسك وتعدل من أدائك”.
متعة التحضير للشخصيات
وأشار مهران إلى أنه يعتبر المذاكرة والتحضير من أجمل ما في مهنة التمثيل، قائلاً: “المذاكرة ممتعة جدًا، حتى لو اللي بتستخدمه منها في الدور نسبة بسيطة، لكن رحلة البحث نفسها عن الشخصية وعالمها بتكون ممتعة وتضيف لك كتير”.
مشاركته في “المداح 5”
وعن مشاركته في مسلسل “المداح – الجزء الخامس”، قال مهران: “التعاون مع حمادة هلال وكل فريق العمل جميل جدًا، بتحس إنك وسط عيلة”.
وحسم الجدل حول ما إذا تعرض لمواقف مرعبة في الكواليس قائلاً: “مفيش أي حاجة غريبة حصلت معايا شخصيًا. حتى في الجزء الثالث صورنا داخل مغارة شبه مهجورة في جبل بقنا، وبرضه الأمور كانت عادية جدًا. وأنا عمومًا مش بخاف من الحاجات دي”.