علّق الإعلامي الساخر باسم يوسف على سؤال طرحه الإعلامي أحمد سالم بشأن معارضته لجماعة الإخوان المسلمين، ثم للدولة، وصولًا إلى معارضته بعد سفره للولايات المتحدة، وذلك خلال ظهوره في فقرة ببرنامج «كلمة أخيرة» المذاع على قناة ON.
أكل عيش طبعًا
وقال يوسف ساخرًا: «أكل عيش طبعًا، أنا مش فاهم يعني إيه معارضة حقيقية، وإيه اللي الواحد المفروض يعمله عشان ميتصنفش إنه معارضة فالصو»، مضيفًا: «أنا واحد بينكّت على الأحوال اللي حواليه إن استطعت إلى ذلك سبيلا، زي ما الناس بتنكت على فيس بوك والسوشيال ميديا، وكل واحد له ميكروفون بينكت فيه، جت عليا أنا يعني».
وتابع: «أنا مشكلتي إنه عشان الريتش والفلورز، إن الميكروفون بتاعي كبير حبتين فبيوجع، وفي أوقات بحافظ على ميكروفوني، فبسكت عشان ميكروفوني ميتقطعش، وفي ناس شايفة الميكروفون ده له أهداف وتصنيفات أو أجندات مختلفة، فدي مشكلتك مش مشكلة الميكروفون».
ليس كاملًا
وأكد يوسف أنه راضٍ عن وضعه الحالي رغم أنه «ليس كاملًا»، مشددًا على أنه لا يرغب في تغيير شيء من مساره الحالي، وأضاف: «الجمهور حاجة كبيرة أوي، وأنا واحد في المجال العام، وبقدم سلعة أو خدمة… سخرية، كوميديا، كلام على الدايت، كلام على السياسة، زي أي حد بيقدم محتوى، كل دي سلع، وفي كل مرة بتقدم المنتج بتاعك بيحصل استفتاء بين المتلقين، وهي دي الشغلانة».
وبشأن موقف معارضي الإخوان ومؤيدي ثورة 30 يونيو منه، قال يوسف: «مراتي وولادي والقطط هما اللي بيحبوني، والقطط عشان بأكلها، وأنا أعتقد إن مصر أكبر بكتير أوي وفيها اتجاهات كتير أوي غير الاتجاهين دول بس، وحتى الناس اللي هنا والناس اللي هنا مش كلهم آرائهم واحدة».
واختتم يوسف حديثه قائلًا: «أنا كان عندي برنامج، والبرنامج ده له تأثير عشان نسب المشاهدة، وأنا كنت جزءًا من المشهد ساعتها، وفي أجزاء تانية من المشهد، ثورات وحراك وبرنامج وأحداث وقرارات، وأكيد في ناس بتشتغل في السياسة بتشوف المشهد كله على بعضه وبتستغله لمصلحتها، وده شيء خارج قدرتي وسيطرتي».