وجه الدكتور أحمد جبيلي، المدير التنفيذي لشركة وايت إيجل للتطوير العقاري، رسالة قوية لطلاب الشهادة الإعدادية وأولياء أمورهم بشأن أهمية التعليم الفني الحديث، مؤكدا أن هذا النوع من التعليم لم يعد كما كان في السابق، بل أصبح أحد الطرق الذكية للوصول إلى التميز والنجاح في سوق العمل.
وفي منشور له عبر صفحاته الرسمية، فيس بوك أشار جبيلي إلى تجارب واقعية لطلاب متفوقين اختاروا التعليم الفني عن قناعة، وحققوا من خلاله نجاحات كبيرة.
وقال جبيلي:” الصنايع بختها معتش ضايع .. الكام يوم اللي فاتوا شوفت وسمعت حكايات نفتخر بيها جدًا من أوائل دبلومات التعليم الفنى اللي كانوا ممكن يدخلوا الثانوي العام بسهولة لأنهم كانوا متفوقين في الإعدادية.. لكن اختاروا طريق تاني لظروف مالية صعبة أو التزامات عائلية أو رؤية ذكية لفرص المستقبل .. والمفاجأة؟ قرارهم كان صح 100% واتحدوا الظروف، ووصلوا لأعلى المراكز، واتأكدوا إن التعليم الفنى مطلوب جدًا في السوق بقي متطور جدًا ويواكب التكنولوجيا وفيه مناهج عملية تفيدك في شغلك على أرض الواقع!”.
وأضاف :” التعليم الفني الجديد غير القواعد وبقي فيه مدارس تكنولوجية متصلة بالسوق من أول يوم َوفرصة تكمل في جامعة تكنولوجية وتاخد شهادة معتمدة مع تدريب عملي يخليك جاهز للشغل بعد التخرج.. لُب الموضوع في الصنايع بختها معتش ضايع ومفيش حاجة اسمها “شهادة أقل”.. ولكن في شهادة أحسن لسوق العمل والتفوق مش في “شهادة الجامعة وخلاص”.. التفوق في إزاي تواكب احتياجات السوق وتكون مؤهل فعلًا!”.
وتابع:” لطلاب الإعدادية وولي الأمر الوقت الحالي يتطلب منك تفكير استراتيجي… اسأل كويس عن كل مسار (عام/فني) واختار اللي يرتبط بمهارات السوق وخليك واعي إن الفرص كتير.. لكن الكوادر المؤهلة قليلة والدليل في مجالات كتير عندها عمالة كثيرة.. لكن قليلين اللي عندهم تأهيل حقيقي”.
واختتم:” الخلاصة في أن التعليم الفني بقى خيار أبطال.. طريق للتميز والقيادة في السوق! مستقبلك يبدأ باختيار ذكي.. اختار اللي يوصلك لهدفك”.